Keu Guree Kamoe Bapak Rusdi Sufi

Oleh: T.A. Sakti

Assalamu’alaikom kawom ikhwany

Hormat ulon bri akan pembaca

Lam “CAKRA HIMAS” lon keuneuk rawi

Keu Pak Rusdi nyang ka “bersara”

Saleuem horeumat bandum bak kami

Bapak Rusdi le that berjasa

Jurusan Seujarah deurajat tinggi

“Jaroe” Pak Rusdi le roeh bak teumpa

Thon tujoh  tujoh  nyan phon mulai

Ci hitong akhi padum thon nyang ka

Lhee ploh dua  thon bak lon teuliti

Dumnan Pak Rusdi ikot meumbina

Dak aneuk manyak umpama tabri

Ka glah mandiri ngon keuluarga

Le that bimbingan bak Pak Rusdi

Jurusan “history”  jeuet that  ta bangga

Jurusan Seujarah tuah han sakri

Bahsa Hollandi dosen jih beuna

Alhamdulillah kana Pak Rusdi

Tan leubeh siji padum treb lama

Le keuleubehan bak Pak Rusdi

Cit diakui dalam ngon luwa

Bak BKSNT pih na berbakti

Ban phon berdiri  gobnyan Keupala

Bak Kanto ARSIP  Kepala lagi

Tanda Pak Rusdi rayek wibawa

Di PDIA   pih sinan  ahli

Jinoe hai akhi  jeuet Direkturnya

Yayasan Peutjut Holland miliki

Bagi rawati jeurat Beulanda

Sinan na tugaih Bapak Rusdi

Wakil Hollandi sinoe di Banda

Kerkhof  Beulanda peunteng that akhi

Nyan keuh bukeuti Aceh  dilee kha

Lawan Beulanda cit hanatom gli

Kafe geutadi  mate meukeuba

Bukonle sayang rangkang Blang Pante

Reubah meugule yoh ujeuen raya

Keu Bapak Rusdi laju lon ca-e

Dengo boh hate wahe syeedara

Bapak Rusdi jareueng na tamse

Teumuleh sabe kreatif raya

Dum geuteurjeumah bahasa kafe

Geutanyoe “ singke”  bahsa Beulanda

Lam bahsa Indonesia ka “ geutuka-ke”

Baro phon hase  jeuet tanyoe  baca

Meutamah ilmee hanale jahe

Sinan Pak Rusdi le  geulhom jasa!!

Buku gob citak rab tiep thon sabe

Tan that meuseuke peuhase dana

Wab nan ka gob thee meubee bukonle

Hingga tan sampe ban ulon rasa

Keu narasumber bit hantom pre-pre

Gob undang sabe dalam ngon luwa

Brunei-Malaysia-Jakarta mise

Eropa lagi miseue Beulanda

Sinoe di Banda hanpeue peugahle

Tiep buleuen tan pre bak ulon kira

U kabupaten neudenden sabe

Makalah hase bahas seureuta

Kisah pribadi bacut lon cungke

Phon ulon turi di Yogyakarta

Di Bulak Sumur na wisma keuce

Sinan Bang Gade teumpat seunia

Teuka Pak Rusdi bak saboh sore

Thon jih lon kire lapan ploh dua

Sayang ban bunoe teubiet Bang Gade

Lon ngon Pak Rusdi treb peugah haba!!

Keunoe u Aceh saheh lon ruge

Watee lon hase tamat sikula

Lapan sikureueng nibak thon ganje

Nasib lon cebre sabab ka ceudra

Woe bak “induk” droe soe pakoe tanle

Alasan geubre bidang sarjana

Bidang sejarah alangkah ganje

Kuliah geubre  bak dosen FH

Meubuleuen-buleuen lon gleuen meuwe-we

Hinggalah sampe FKIP  jak bila

Dosen sejarah peuget rapatle

Bandum kheun sare lon geuteurima

Putusan rapat surat keutikle

Teken lajule uleh Ketua

Ketua Jurusan yohnyan boh hate

Pak Rusdi Sufi tamatan Yogya

Wahe Ya Allah Po Rabbon Kade

Rahmat neu gule keu kamoe dumna

Bapak Rusdi ngon kamoe kacre!

Neubri  lam hate sabe seutia

Kon kamoe hantueng, kon neuplueng ugle

Pansiun  sampe  katroih bak masa!

Seulamat jalan jaroe meulambe!

Kamoe neupike bah dare luwa!

Do’a bak kamoe sabe hantom pre

Beudalam sabe sihat seujahtra

Beu sihat badan pikiran caye

Buku ngen “tafse” beule bak nyangka!

Amin Ya Allah kisah ka akhe

Bak Rabbon Kade rahmat tadamba!!

Bak T.A. Sakti ka tamat ca-e

Meu’ah boh hate pat kureueng rasa!!

Darussalam, 29 Desember 2009

*Penulis,Drs. Teuku Abdullah, SH alias T.A. Sakti.

Catatan: – bersara = pensiun:   Bapak  Drs. Rusdi Sufi mulai

Pensiun bulan September 2009. Holandi = Belanda, tuah han sakri = sungguh bertuah, BKSNT = Balai Kajian Sejarah Dan Nilai Tradisional Banda Aceh, PDIA = Pusat Dokumentasi dan Informasi Aceh, Taman Kerkhof Banda Aceh  = kuburan para serdadu Belanda yang tewas dalam perang Belanda di Aceh, meubee bukonle = sungguh harum,FH = Fakultas Hukum = sewaktu mendapat beasiswa dari Lembaga Kerjasama Indonesia-Belanda/LIPI  ke UGM Yogya 1982,  saya mahasiswa FH Unsyiah.